पूर्ण सार्की/ डोल्पा। हिमाली जिल्ला डोल्पामा निर्माणाधीन जगदुल्ला हाईड्रोपावर कम्पनी लिमिटेड र राष्ट्रिय प्रसारण ग्रिड कम्पनी लिमिटेडबीच विद्युत निकासीको लागि साझेदारी भएको छ ।

जगदुल्ला हाइड्रोपावर अन्तर्गत जगदुल्ला–ए जलविद्युत आयोजनाको १२४.३५ मेगावाटको विद्युत निकासीका लागि समझदारी भएको कम्पनी लिमिटेडका कार्यकारी अधिकृत सञ्जय सापकोटाले जानकारी दिए ।

उक्त समझदारीअनुसार ४०० केभी भेरी करिडोरमार्फत आवश्यक प्रसारण पूर्वाधार विकास गरिने उनले बताए । यस साझेदारीले जगदुल्लामा उत्पादित विद्युत राष्ट्रिय प्रसारण प्रणालीमा जोड्न महत्वपूर्ण भूमिका खेल्ने उनको भनाइ छ ।

राष्ट्रिय प्रसारण ग्रिड कम्पनी सँगको यो सहकार्य नेपालको ऊर्जा प्रणाली सुदृढीकरणतर्फ महत्वपूर्ण कदम भएको बताउँदै अधिकृत सापकोटाले आयोजनाबाट उत्पादित विद्युत प्रभावकारी रूपमा राष्ट्रिय ग्रिडमा समावेश गर्न प्रसारण पूर्वाधार विकास अनिवार्य रहेको बताए।

यस परियोजनाले कर्णाली सहित समग्र देशको जलविद्युत क्षेत्रको विकासमा टेवा पुर्‍याउने छ । साथै यस परियोजनाले दीर्घकालीन रूपमा ऊर्जा आपूर्ति व्यवस्थापनमा समेत सकारात्मक प्रभाव पार्ने छ ।